un se karam ki rakh ummid un ki ata se pyaar kar
ai dil-e-mubtala-e-gham gham ko bhi ḳhush-gavar kar
husn-e-yaqin-e-ashiqi itna tu pa.edar kar
ḳhud par bhi e’timad rakh un par bhi e’tibar kar
dil men jo mere zaḳhm men un ka na ab shumar kar
sina-e-dagh-dar ko aur bhi dagh-dar kar
shorish-e-agahi ke saath husn-e-shu.ur shart hai
zauq-e-junun-navaz ab aur na sharmsar kar
tujh se hanuz hai nihan fikr ka ik naya jahan
azm-o-amal se ziist ke husn ko ashkar kar
hasil-e-ka.enat the bas vahi zindagi ke din
ham teri bargah men aa.e hain jo guzar kar
sina-e-tirgi se hi phuTegi ek mauj-e-nur
muntazir hayat-e-nau sub.h ka intizar kar
dard-e-hayat dard-e-dil dard-e-firaq dard-e-gham
ye hain mata-e-la-zaval in se ‘aziz’ pyaar kar
Leave a Reply