Asad Badayuni
hava havas ke ilaqe dikha rahi hai mujhe
gul-e-gunah ki mahak phir bula rahi hai mujhe
abhi na ja.unga main dusre sitare par
ki ye zamin abhi raas aa rahi hai mujhe
charagh bhi mira chehra hai shab bhi mera jism
to phir ye ḳhalq-e-ḳhuda kyuun jala rahi hai mujhe
samajh men kuchh nahin aata ki ye hava-e-vajud
jala rahi hai mujhe ya bujha rahi hai mujhe
giyah-e-ishq bhi meri gul-e-havas bhi mire
to kyuun zamin tamasha bana rahi hai mujhe
Leave a Reply