Bashir Farooqi
ab ke junun men lazzat-e-azar bhi nahin
zaḳhm-e-jigar men surḳhi-e-ruḳhsar bhi nahin
ham tere paas aa ke pareshan hain bahut
ham tujh se duur rahne ko tayyar bhi nahin
ye hukm hai ki saunp do nazm-e-chaman unhen
nazm-e-chaman se jin ko sarokar bhi nahin
toḌa hai us ne dil ko mire kitne husn se
avaz bhi nahin koi jhankar bhi nahin
ham parsa hain phir bhi tire dast-e-naz se
mil jaa.e koi jaam to inkar bhi nahin
Thahre agar to duur nikal ja.egi hayat
chalte raho ki fursat-e-didar bhi nahin
jashn-e-bahar dekhne valon ko dekhiye
daman men jin ke phuul to kya ḳhaar bhi nahin
Leave a Reply