Hasan Rizvi
sanjh-savere phirte hain ham jaane kis virane men
savan jaisi dhuup likhi hai qismat ke har ḳhane men
us ne pyaar ke saare bandhan ik lamhe men toḌ diye
jis ki ḳhatir rusva hain ham is be-dard zamane men
shab ki siyahi aur baḌhegi aur sitare TuTenge
kuchh to vaqt lagega aḳhir naya savera aane men
kitne pipal suukh ga.e hain kitne dariya ḳhushk hue
kitne mausam biit ga.e hain badal ko bahlane men
sidhe-sade panchhi ki manind vo shayad lauT aa.e
aas laga.e baiThe hain ham apne hairat-ḳhane men
paḌhna likhna chhuT gaya hai sajan jab se ruuTh gaya
kaḌvi kaḌvi se lagti hai ab to har shai khane men
Leave a Reply