Ashfaq Husain
na-mehrban hai tu to koi mehrban bhi hai
hai jis jagah zamin vahan asman bhi hai
tabdil kar ke dekh nigahon ke zaviye
jo teri aankh men hai vo manzar yahan bhi hai
yuun hi to rabton men nahin hai khinchav sa
ham hi nahin hain aur koi darmiyan bhi hai
mil hi gaya hai jab to mohabbat se baat kar
varna ye dhyan rakh mire munh men zaban bhi hai
us raat ke idhar bhi hai ik sub.h ka vajud
mera yaqin bhi hai ye mera guman bhi hai
meri ghazal men sirf ghazal ki faza nahin
lafzon ki ka.enat men dil ki zaban bhi hai
Leave a Reply