jo puchha munh dikhane aap kab chilman se niklenge
to bole aap jis din hashr men madfan se niklenge
jalega dil tumhen bazm-e-adu men dekh kar mera
dhuan ban ban ke arman mahfil-e-dushman se niklenge
ikaTThe kar ke teri dusri tasvir khinchunga
vo sab jalve jo chhan chhan kar tiri chilman se niklenge
siyah poshak dosh-e-naz par bikhri hui zulfen
mire matam ki shirkat ko baḌe joban se niklenge
hamen parva nahin is ki qayamat laakh baar aa.e
na tum madfan pe aaoge na ham madfan se niklenge
tire daman se badla lenge zalim ḳhun-e-nahaq ka
vo favvare lahu ke jo miri gardan se niklenge
yahi rishta junun-e-ashiqi ka hai to kuchh din men
mire tar-e-gareban yaar ke daman se niklenge
hazaron husn vaale is zamin men dafn hain ‘muztar’
qayamat hogi jab ye sab ke sab madfan se niklenge
Leave a Reply