Ai Meri Jaan Hamesha Ho Teri Jaan Ki Khair

ai miri jaan hamesha ho tiri jaan ki khair

nazuki daur-e-bala, husn ke saman ki khair

raat din shaam sahar pahar ghadi pal saaat

mangte jaati hai ham ko tiri aan aan ki khair

mehndi choti ho sivai ho chamak peti ki

umr choti ki badi zulf-e-pareshan ki khair

be-tarah bojh se jhumkon ke jhuke padte hain

kiijo allah tu un jhumkon ki aur kaan ki khair

paan khaya hai to is vaqt bhi lazim hai yahi

ek bosa hamen diije lab-o-dandan ki khair

aankh utha dekhiye aur dekh ke hans bhi diije

apne kajal ki zakat aur misi-o-pan ki khair

pahle jis aan tumhari ne liya dil ham se

ab talak mangte hain dil se ham us aan ki khair

kya ghazab nikle hai ban-than ke vo kafir yaaro

aaj hoti nazar aati nahin iman ki khair

jitne mahbub pari-zad hain duniya men ‘nazir’

sab ke allah kare husn ki aur jaan ki khair

Leave a Comment