Dil Se Kya Puchhta Hai Zulf-E-Girah-Gir Se Puchh

Imdad Imam Asar

dil se kya puchhta hai zulf-e-girah-gir se puchh

apne divane ka ahval tu zanjir se puchh

meri jan-bazi ke jauhar nahin raushan tujh par

kuchh khule hain tiri shamshir pe shamshir se puchh

pursish-e-hal ko jaati hai kahan ai laila

qais ki shakl hai kya qais ki tasvir se puchh

vaqif-e-raz nahin pir-e-mughan sa koi

hai dila puchhna jo kuchh tujhe us piir se puchh

vaqif-e-lazzat-e-azar nahin har koi

kya maza gham men hai ye ashiq-e-dil-gir se puchh

garmi-e-shauq nahin hai to dahan men ai sham.a

kis liye teri zaban leta hai gul-gir se puchh

ulTi kyuun paḌti hai tadbir ye ham kya janen

kaun ulaT deta hai is raaz ko tadbir se puchh

mujh se ai davar-e-mahshar hai ye pursish kaisi

puchhna hai tujhe jo kuchh miri taqdir se puchh

yuun to ustad-e-fan-e-sher bahut se guzre

kis ko kahte hain ghazal-goi ‘asar’ ‘mir’ se puchh