har ghaḌi dard ki shiddat se bilakti ankhen
atish-e-hijr se har lamha pighalti ankhen
ek lamhe ki mulaqat hui umr ka rog
us ki surat ko hain har vaqt tarasti ankhen
dil-e-betab men ab tak vo machalti ḳhvahish
teri ḳhushbu se musalsal ye mahakti ankhen
ḳhvab men Thahra hua jhiil ka niila manzar
aur usi jhiil kinare hain bhaTakti ankhen
ab to vahshat si Tapakti hai har ik manzar se
soz-e-hijran ki tapish se hain sulagti ankhen
ishq nilam hua aam ya nakam hua
rah ga.iin ahl-e-vafa ki to barasti ankhen
samne pa ke use dusri janib takna
ye haqiqat men hain ‘shahin’ sambhalti ankhen
Leave a Reply