Ajmal Siraj
kisi ki qaid se azad ho ke rah gae hain
tabah ho gae barbad ho ke rah gae hain
ab aur kya ho tamanna-e-vasl ka anjam
dil o dimagh tiri yaad ho ke rah gae hain
kahen to qissa-e-ahval muḳhtasar ye hai
ham apne ishq ki rudad ho ke rah gae hain
kisi ki yaad dilon ka qarar Thahri hai
kisi ke zikr se dil shaad ho ke rah gae hain
tire huzur jo rashk-e-bahar the ‘ajmal’
ḳharab-o-ḳhvar tire ba.ad ho ke rah gae hain
Leave a Reply