be-mausam hi ankhon men bhar jaate hain
aansu bhi to chalaki kar jaate hain
dil ka sauda un ke bas ki baat nahin
aune-paune daam laga kar jaate hain
har din zinda rahne men hai ḳharch bahut
aao chalo ik do din ko mar jaate hain
qatl ujale bhi kar dete hain lekin
sab ilzam andheron ke sar jaate hain
kaise ji lete hain log andheron men
ham to sirf tasavvur se Dar jaate hain
reza reza hona un ki qismat hai
su-e-falak jo be-bal-o-par jaate hain
Leave a Reply