Amjad Islam Amjad
sainkaḌon hi rahnuma hain rasta koi nahin
aa.ine charon taraf hain dekhta koi nahin
sab ke sab hain apne apne da.ere ki qaid men
da.eron ki had se bahar sochta koi nahin
sirf matam aur zaari se hi jis ka hal mile
is tarah ka to kahin bhi mas.ala koi nahin
ye jo saa.e se bhaTakte hain hamare ird-gird
chhu ke un ko dekhiye to vahima koi nahin
jo hua ye darj tha pahle hi apne baḳht men
is ka matlab to hua ki bevafa koi nahin
tere raste men khaḌe hain sirf tujh ko dekhne
mudda.a puchho to apna mudda.a koi nahin
kun-fakan ke bhed se maula mujhe agah kar
kaun huun main gar yahan par dusra koi nahin
vaqt aisa ham-safar hai jis ki manzil hai alag
vo sara.e hai ki jis men Thaharta koi nahin
gaahe gaahe hi sahi ‘amjad’ magar ye vaqi.a
yuun bhi lagta hai ki duniya ka ḳhuda koi nahin
Leave a Reply