Suhail Kakorvi
ḳhushamad kar ke vo pahron kabhi mujh ko manata hai
use meri tarah se chahne ka Dhang aata hai
jahan-e-husn ki ra.ana.iyon men shauq ka aalam
shararat jab bhi dil karta hai dilbar muskurata hai
ba-sad lutf-o-karam le kar mujhe jaata hai dariya tak
Dubo kar mujh ko ḳhud bhi vo usi men Duub jaata hai
ba-vaqt-e-ḳhas mujh ko munkashif karta hai vo mujh par
vo apni shan-e-yakta.i ka jalva yuun dikhata hai
lakiren mere hathon ki yakayak jagmagati hain
mire hathon men jis lamha tumhara haath aata hai
mujhe is qism ki koi shikayat hi nahin us se
jalata hai kuḌhata hai satata hai rulata hai
yahi qissa hai maut-o-zindagi ka ai mire hamdam
koi apni ada.en dil-ruba ke ruḳh dikhata hai
‘suhail’ is tarah likhta hai vo ḳhud-ara.i ka qissa
vo apna naam likh kar phir tumhara naam laata hai
Leave a Reply