Ek Husn-Farosh Se

Akhtar Shirani

mohabbat aah teri ye mohabbat raat bhar ki hai

tiri rangin khalvat ki latafat raat bhar ki hai

tire shadab honton ki inayat raat bhar ki hai

tire mastana boson ki halavat raat bhar ki hai

mah-e-raushan hai tu aur teri talat raat bhar ki hai

gul-e-shabbu hai tu aur teri nikhat raat bhar ki hai

tu kya jaane ki sauda-e-mohabbat kis ko kahte hain

mohabbat aur mohabbat ki latafat kis ko kahte hain

gham-e-hijran hai kya aur soz-e-ulfat kis ko kahte hain

junun hota hai kaisa aur vahshat kis ko kahte hain

tu kya jaane gham-e-shab-ha-e-furqat kis ko kahte hain

tire izhar-e-ulfat ki fasahat raat bhar ki hai

nigah-e-mast se dil ko mire tadpa rahi hai tu

ada-e-shauq se jazbat ko bhadka rahi hai tu

mujhe bachche ki surat naaz se phusla rahi hai tu

khilaune de ke boson ke mujhe bahla rahi hai tu

magar nadan hai tu aah dhoka kha rahi hai tu

tira ru-e-darakhshan hai ba-zahir mahtab-asa

tire honton ki shadabi hai rangat men sharab-asa

tire rukhsar ki mahtabiyan hain aftab-asa

magar in ki haqiqat hai habab-asa sarab-asa

ki ghaze ki sabahat us pe chhai hai naqab-asa

aur is ghaze ki bhi jhuti sabahat raat bhar ki hai

ye maana teri khalvat ki faza ruh-e-gulistan hai

tiri khalvat ka har fanus ik mahtab-e-larzan hai

tira abreshmi bistar nahin ik khvab-e-khandan hai

tira jism afat-e-dil tera siina afat-e-jan hai

tu ik zinda sitara hai jo tanhai men taban hai

magar kahte hain taron ki hukumat raat bhar ki hai

latafat se hain khali tere kumhlae hue bose

taravat se hain khali tere murjhae hue bose

nazakat se hain khali tere ghabrae hue bose

haqiqat se hain khali tere sharmae hue bose

mohabbat se hain khali tere ghabrae hue bose

aur in boson ki ye jhuti halavat raat bhar ki hai

tire zahrile bose mujh ko jis dam yaad aenge

mire honton pe kaale naag ban kar thartharaenge

pashemani ke jazbe mujh ko divana banaenge

mire inkar ko nafrat ke khanjar gudgudaenge

mire dil ki ragon men gham ke shoale tair jaenge

main samjha! aah samjha! ye masarrat raat bhar ki hai

mujhe divana karne ki masarrat be-khabar kab tak

rahegi mere dil men teri ulfat kargar kab tak

mujhe mashur rakkhega ye ishq-e-be-samar kab tak

haqiqat ki sahar akhir na hogi parda-dar kab tak

mujhe maghlub kar ke khush hai tu zalim magar kab tak

tiri ye fath meri ye hazimat raat bhar ki hai