abhinandan-pandey

Khushnuma Dhun Pe Raqam Dard Ke Naghmat Sa Tha

khushnuma dhun pe raqam dard ke naghmat sa tha

vaqt-e-rukhsat bhi junun pahli mulaqat sa tha

jism ke dasht men raqsan the mahakte hue zakhm

kal shab-e-hijr ka aalam shab-e-barat sa tha

dil ke dariya men thirakta tha tiri yaad ka chand

shab ke honton pe tira zikr munajat sa tha

main to ik umr faqat us ke taaqub men raha

jo miri zaat men maujud tiri zaat sa tha

lams-e-akhir mire kashkol-e-badan ki khatir

ek muflis ko mayassar hui khairat sa tha

main tire shokh labon par to abhi aaya huun

is se pahle tiri ankhon men savalat sa tha

jagmagate hue jugnu na ziyan hota charagh

raat men kuchh bhi na tha jis ko kahen raat sa tha

More Poems

Leave a Comment