Hasan Zaheer Raja
kahin kahin se mohabbat vasul hone lagi
dua jo ki hi nahin thi qubul hone lagi
main baiThe baiThe yuun hi raqs par utar aaya
phir ek aan men duniya ye dhuul hone lagi
ab ek jaise to hote nahin sabhi manzar
kahin pe ḳhush to kahin vo malul hone lagi
main ek baar udhar bhuul kar chala gaya tha
phir us ke ba.ad musalsal ye bhuul hone lagi
ab apne beach yahi ḳhamushi hi behtar hai
ki guftugu to hamari fuzul hone lagi
ye baagh dasht men tabdil ho raha hai ‘hasan’
jo shaḳh-e-phul thi pahle babul hone lagi
Leave a Reply