Hasan Kuza-Gar (4)

jahan-zad kaise hazaron baras baad

ik shahr-e-madfun ki har gali men

mere jaam o miina o gul-dan ke reze mile hain

ki jaise vo is shahr-e-barbad ka hafiza hon

hasan naam ka ik javan kuza-gar ik nae shahr men

apne kuuze banata hua ishq karta hua

apne maazi ke taron men ham se piroya gaya hai

hamin men ki jaise hamin hon samoya gaya hai

ki ham tum vo barish ke qatre the jo raat bhar se

hazaron baras rengti raat bhar

ik dariche ke shishon pe girte hue saanp lahren

banate rahe hain

aur ab is jagah vaqt ki subh hone se pahle

ye ham aur ye naujavan kuza-gar

ek ruuya men phir se piroe gae hain

jahan-zad

ye kaisa kohna-paraston ka amboh

kuzon ki lashon men utra hai

dekho

ye vo log hain jin ki ankhen

kabhi jaam o miina ki lim tak na pahunchin

yahi aaj is rang o roghan ki makhluq-e-be-jan

ko phir se ulatne palatne lage hain

ye un ke tale gham ki chingariyan pa sakenge

jo tarikh ko kha gai thiin

vo tufan vo andhiyan pa sakenge

jo har chikh ko kha gai thiin

unhen kya khabar kis dhanak se mere rang aae

mere aur is naujavan kuza-gar ke

unhen kya khabar kaun si titliyon ke paron se

unhen kya khabar kaun se husn se

kaun si zaat se kis khadd-o-khal se

main ne kuzon ke chehre utare

ye sab log apne asiron men hain

zamana jahan-zad afsun-zada burj hai

aur ye log us ke asiron men hain

javan kuza-gar hans raha hai

ye masum vahshi ki apne hi qamat se zholida-daman

hain juuya kisi azmat-e-na-rasa ke

unhen kya khabar kaisa aseb-e-mubram mere ghaar siine pe tha

jis ne mujh se aur us kuza-gar se kaha

ai hasan kuza-gar jaag

dard-e-risalat ka roz-e-basharat tire jaam o miina

ki tishna-labi tak pahunchne laga hai

yahi vo nida ke pichhe hasan naam ka

ye javan kuza-gar bhi

pyape ravan hai zaman se zaman tak

khizan se khizan tak

jahan-zad main ne hasan kuza-gar ne

bayaban bayaban ye dard-e-risalat saha hai

hazaron baras baad ye log

rezon ko chunte hue

jaan sakte hain kaise

ki mere gil o khaak ke rang o roghan

tire nazuk aaza ke rangon se mil kar

abad ki sada ban gae the

main apne masamon se har por se

teri banhon ki pahnaiyan

jazb karta raha tha

ki har aane vaale ki ankhon ke mabad pe ja kar chadhaun

ye rezon ki tahzib pa len to pa len

hasan kuza-gar ko kahan la sakenge

ye us ke pasine ke qatre kahan gin sakenge

ye fan ki tajalli ka saaya kahan pa sakenge

jo badhta gaya hai zaman se zaman tak

khizan se khizan tak

jo har naujavan kuza-gar ki nai zaat men

aur badhta chala ja raha hai!

vo fan ki tajalli ka saaya ke jis ki badaulat

hama ishq hain ham

hama kuza-gar ham

hama-tan khabar ham

khuda ki tarah apne fan ke khuda sar-ba-sar ham

arzuen kabhi payab to saryab kabhi

tairne lagte hain behoshi ki ankhon men kai chehre

jo dekhe bhi na hon

kabhi dekhe hon kisi ne to suragh un ka

kahan se paae

kis se iifa hue andoh ke adab kabhi

arzuen kabhi payab to saryab kabhi

ye kuzon ke lashe jo in ke liye hain

kisi dastan-e-fana ke vaghaira vaghaira

hamari azaan hain hamari talab ka nishan hain

ye apne sukut-e-ajal men bhi ye kah rahe hain

vo ankhen hamin hain jo andar khuli hain

tumhen dekhti hain har ik dard ko bhanpti hain

har ik husn ke raaz ko janti hain

ki ham ek sunsan hujre ki us raat ki aarzu hain

jahan ek chehra darakhton ki shakhon ke manind

ik aur chehre pe jhuk kar har insan ke siine men

ik barg-e-gul rakh gaya tha

usi shab ka duz-dida bosa hamin hain

Leave a Comment