Tumhaari Yaad Jo Aai to De Ke Aah Gai

Poet

tumhari yaad jo aa.i to de ke aah ga.i

bana ke dard ko apna yahan gavah ga.i

palaT ke aaoge tum is liye ba-hasrat-o-yas

tumhare pichhe baḌi duur tak nigah ga.i

mila ke chhoḌ diya aḳhirash mohabbat ne

tumhare ghar hi ga.i jo hamari raah ga.i

vo aarzu jo dabe paanv aa.i thi dil men

bana ke mujh ko mire dil ka badshah ga.i

na chhoḌa ham ko kahin ka tumhari ulfat ne

juda.i de ke qayamat ka intibah ga.i

ye sach hai ham ne bhi aksar nibahi hai us se

hamare saath bhi ye zindagi nibah ga.i

vo ek laḌki samajhte the na-samajh jis ko

hamare sher pe vo kar ke vaah vaah ga.i

mili thi raah men rusva.i jo hamen ‘jami’

juda hui to ḳhushi de ke be-panah ga.i