hamen nahin aate ye kartab na.e zamane vaale
ham to sidhe log hain yaaro vahi purane vaale
un ke hote koi kami hai raton ki raunaq men
yaden ḳhvab dikhane vaali ḳhvab suhane vaale
kahan ga.iin rangin patangen laTTu kanch ke banTe
ab to khel bhi bachchon ke hain dil dahlane vaale
vo anchal se ḳhushbu ki lapTen bikhrate paikar
vo chilman ki oT se chehre chhab dikhlane vaale
baam pe jaane vaale janen us mahfil ki baten
ham to Thahre us kuche men ḳhaak uḌane vaale
jab guzroge un raston se tapti dhuup men tanha
tumhen bahut yaad a.enge ham saa.e bichhane vaale
tum tak shayad der se pahunche mira mohazzab lahja
pahle zara ḳhamosh to hon ye shor machane vaale
ham jo kahen so kahne dena sanjida mat hona
ham to hain hi sha.er baat se baat banane vaale
achchha pahli baar kisi ko meri fikr hui hai
main ne bahut dekhe hain tum jaise samjhane vaale
aise labalab kab bharta hai har ummid ka kaasa
mujh ko hasrat se takte hain aane jaane vaale
saffaki men ek se hain sab jin ke saath bhi jaao
ka.abe vaale is janib hain vo but-ḳhane vaale
mere shahar men maang ab to bas un logon ki hai
kafan banane vaale ya murde nahlane vaale
giit rasile bol sajile kahan sunoge ab tum
ab to kahta hai ‘irfan’ bhi sher rulane vaale
Leave a Reply