Saleem Shahid
zamin ko sajda kiya ḳhuun se ba-vazu ho kar
main razm-gah se lauTa huun suraḳh-ru ho kar
jahan men phail ga.i dud-e-sho.ala se zulmat
falak pe bah gaya suraj lahu lahu ho kar
mujhe tha dam-e-asiri nasheb dariya ka
uchhal gaya main kinaron se tund-ḳhu ho kar
gurez-pa.i ko hai gumrahi ka dasht-e-bala
ḳhat-e-safar to chamakta hai ab-ju ho kar
vo lams za.iqa jis ne miri zaban ko diya
bikhar na jaa.e kahin saut-e-guftugu ho kar
kiya hai pursish-e-ahval-e-zaḳhm ne rusva
ye chaak aur numayan hua rafu ho kar
rahi na TuuT ke girne se meri yakta.i
main paash paash hua ḳhud se du-ba-du ho kar
zaban-e-ḳhalq pe shahid main harf-e-talḳh raha
uḌi na ḳhaak miri gard-e-abru ho kar
Leave a Reply