Muntashir Zehn Ki Sochon Ko ikaTTha Kar Do

muntashir zehn kī sochoñ ko ikaTThā kar do

tum jo aa jaao to shāyad mujhe tanhā kar do

dar-o-dīvār pe paḌhtā rahūñ nauha kal kā

is ujāle se to behtar hai añdherā kar do

ai mire ġham kī chaTāno kabhī mil kar TuuTo

is qadar zor se cīḳho mujhe bahrā kar do

jā rahe ho to mire ḳhvāb bhī lete jaao

dil ujāḌā hai to āñkhoñ ko bhī sahrā kar do

kuchh nahīñ hai to ye pindār-e-junūñ hai kīsar

tum ko mil jaa.e girebāñ to tamāshā kar do

Leave a Comment