Naseer Turabi
saba ka narm sa jhonka bhi taziyana hua
ye vaar mujh pe hua bhi to gha.ebana hua
usi ne mujh pe uTha.e hain sang jis ke liye
main paash paash hua ghar nigar-ḳhana hua
jhulas raha tha badan garmi-e-nafas se magar
tire ḳhayal ka ḳhurshid shamiyana hua
ḳhud apne hijr ki ḳhvahish mujhe aziiz rahi
ye tere vasl ka qissa to ik bahana hua
ḳhuda ki sard-mizaji sama ga.i mujh men
miri talash ka sauda payambarana hua
main ik shajar ki tarah rah-guzar men Thahra huun
thakan utaar ke tu kis taraf ravana hua
vo shaḳhs jis ke liye sher kah raha huun ‘nasir’
ghazal suna.e hue us ko ik zamana hua
Leave a Reply