Be-Qasd Safar Jate Hain Malum Nahin Kyun

Poet

be-qasd safar jaate hain ma.alum nahin kyuun

phir ḳhud hi Thahar jaate hain ma.alum nahin kyuun

ham pyaar se jiine ki dua dete hain jin ko

vo log bhi mar jaate hain ma.alum nahin kyuun

kuchh log tujhe dekh ke ai fasl-e-baharan

ba-dida-e-tar jaate hain ma.alum nahin kyuun

ik vahm samajhte the haqiqat ko jo kal tak

ab ḳhvab se Dar jaate hain ma.alum nahin kyuun

utre hue chehron ko bhi ye kahte suna hai

kuchh ham se bhi Dar jaate hain ma.alum nahin kyuun

ik silsila ashk hai shabnam magar is se

gulzar nikhar jaate hain ma.alum nahin kyuun

manzil ki taraf rah-e-mohabbat ke musafir

be-raḳht-e-safar jaate hain ma.alum nahin kyuun

kuchh dekh ke kuchh soch ke kuchh log jahan se

chup-chap guzar jaate hain ma.alum nahin kyuun

kashti ko Dubo kar usi kashti ke muhafiz

ḳhud paar utar jaate hain ma.alum nahin kyuun

ghar men koi aram ki surat nahin phir bhi

thak-har ke ghar jaate hain ma.alum nahin kyuun

haan aks-e-ruḳh-e-sang-zada se bhi to ai ‘lais’

a.ine sanvar jaate hain ma.alum nahin kyuun