main jahan tha
vahan tirgi thi khamoshi thi afsurdagi thi
mire kaan naghmon se mahrum the
siskiyan mere honton ki miras thiin
meri ankhen kisi sail-e-pur-nur ki muntazir thiin
miri zindagi raakh ka dher thi
main yahan aa gaya
is tarah khuld men
us musalsal aziyyat se kahish se bachne ki khatir
ki jis se faqat ek main hi nahin
mere jaise kai aur bhi jan-ba-lab the
tira khuld mere liye
mere jaise kai dusron ke liye
raushni naghmagi sarkhushi ki alamat tha ye!
main jahan huun
vahan tirgi hai khamoshi hai afsurdagi hai
mire kaan naghmon se mahrum hain
siskiyan mere kanon ki miras hain
meri ankhen kisi sail-e-pur-nur ki muntazir hain
meri zindagi raakh ka dher hai!
Leave a Reply