Arshad Abdul Hamid
rukte hue qadmon ka chalan mere liye hai
sayyara-e-hairat ki thakan mere liye hai
koi mira aahu mujhe la kar nahin deta
kahte to sabhi hain ki ḳhutan mere liye hai
tap si mujhe aa jaati hai aghosh men us ki
vo barf ke gaale sa badan mere liye hai
hain ju-e-tab-o-tab pe anvar ke pyase
aur shaam ka ye sanvala-pan mere liye hai
qandhar na kabul na yaman mere liye hai
miTTi ke ujaḌne ki chubhan mere liye hai
barut men bhunte hue alfaz o mafahim
ab to yahi tasvir-e-suḳhan mere liye hai
duniya hi nahin ḳhud se ḳhafa rahta huun ‘arshad’
jiine ka ye andaz hi fan mere liye hai
Leave a Reply