nazar nazar be-qarar si hai nafas nafas men sharar sa hai
main janta huun ki tum na aaoge phir bhi kuchh intizar sa hai
mire azizo mire rafiqo chalo koi dastan chheḌo
gham-e-zamana ki baat chhoḌo ye gham to ab sazgar sa hai
vahi fasurda sa rang-e-mahfil vahi tira ek aam jalva
miri nigahon men baar sa tha miri nigahon men baar sa hai
kabhi to aao kabhi to baiTho kabhi to dekho kabhi to puchho
tumhari basti men ham faqiron ka haal kyuun sogvar sa hai
chalo ki jashn-e-bahar dekhen chalo ki zarf-e-bahar janchen
chaman chaman raushni hui hai kali kali pe nikhar sa hai
ye zulf-bar-dosh kaun aaya ye kis ki aahaT se gul khile hain
mahak rahi hai faza-e-hasti tamam aalam bahar sa hai
Leave a Reply