Zindagi Ka Hai Ye Bhi Koi Dhang

Poet

zindagi ka hai ye bhi koi Dhang

na koi aarzu na koi umang

hosh ka tuur ya ḳhirad ka rang

ashiqi ke liye hain donon nang

aql hairan hai aur fikr hai dang

jalva aur vo bhi sar-ba-sar be-rang

sulh-e-kul ishq ka har ik andaz

husn ki har ada payam-e-jang

abhi jiite hain ahrman-zade

abhi barpa hai ḳhair-o-shar ki jang

allah allah ye husn ka aalam

phuul jaise khile hon ranga-rang

qahqahe un ke sagharon ki khanak

muskurahaT tulu-e-sub.h ka rang

kitni rangin hai ghazal teri

bandh gaya bazm men ‘jamali’ rang