vahshat-e-jan ko payam-e-nigah-e-naz to do
is fasane ko zara garmi-e-aghaz to do
mere qadmon ke nishan raah se kuchh duur sahi
tum se main duur nahin huun mujhe avaz to do
dil men tufan nahin ho to kare kya naghma
main sunata huun yahi raag mujhe saaz to do
koi buniyad nahin qaid-e-ta.alluq ki abhi
jazba-e-gham ko zara fikr ka andaz to do
us ne siine se lagaya jo kaha main ne ‘hasan’
dil men rakhne ke liye apna koi raaz to do
Leave a Reply