Saleem Kausar
kya bataen fasl-e-be-khvabi yahan bota hai kaun
jab dar-o-divar jalte hon to phir hota hai kaun
tum to kahte the ki sab qaidi rihai pa gae
phir pas-e-divar-e-zindan rat-bhar rota hai kaun
bas tiri bechargi ham se nahin dekhi gai
varna haath aai hui daulat ko yuun khota hai kaun
kaun ye patal se le kar ubharta hai mujhe
itni tahdari se mujh par munkashif hota hai kaun
koi be-tartibi-e-kirdar ki had hai ‘salim’
dastan kis ki hai zeb-e-dastan hota hai kaun
Leave a Reply