Darshan Singh
vo saliqa hamen jiine ka sikha de saaqi
jo gham-e-dahr se begana bana de saaqi
jam-o-mina miri nazron se haTa de saaqi
ye jo ankhon men chhalakti hai pila de saaqi
sho.ala-e-ishq se chhalka de mire shishe ko
aur betab ko betab bana de saaqi
haram-o-dair men baT jaate hain rindan-e-vafa
haram-o-dair ki tafriq miTa de saaqi
sun raha huun ki mayassar hi nahin duniya men
ik nigah raz-e-do-alam jo bata de saaqi
ḳhushk hai mausam-e-ehsas faza pyasi hai
ḳhum ke ḳhum sina-e-geti pe lunDha de saaqi
phir kabhi hosh na aa.e to koi baat nahin
aaj ham jitni piyen utni pila de saaqi
josh-e-masti men baghal-gir huun bichhḌe hue dil
aaj insan ko insan bana de saaqi
zindagi ḳhvab-e-musalsal ke siva kuchh na sahi
us ki ta.abir to ‘darshan’ ko bata de saaqi
Leave a Reply