Dikhla Na Khaal-E-Naf Tu Ai Gul-Badan Mujhe

dikhla na khal-e-naf tu ai gul-badan mujhe

har laala yaan hai nafa-e-mushk-e-khutan mujhe

hamdam vabal-e-dosh na kar pairahan mujhe

kanta sa hai khatakta mira tan badan mujhe

phirta liye chaman men hai divana-pan mujhe

zanjir-e-pa hai mauj-e-nasim-e-chaman mujhe

tasbih-e-daur-e-bazm men dekho imaam ko

bakhshi hai haq ne zeb-e-sar-e-anjuman mujhe

ai mere yasman tire dandan-e-abdar

gulshan men hain rulate gul-e-yasman mujhe

mehrab-e-kaba jab se hai tera kham-e-kaman

said-e-haram samajhte hain navak-fagan mujhe

hai tan men risha-ha-e-nae khushk ustukhvan

kyuun khinchta hai kanton men ai zof-e-tan mujhe

ai lab misi ko phenk ki nilam hai kam-baha

yaqut de ya de koi lal-e-yaman mujhe

huun shama ya ki shola khabar kuchh nahin magar

fanus ho raha hai mira pairahan mujhe

ik sarzamin-e-lala bahar o khizan men huun

yaksan hai dagh-e-taza o dagh-e-kuhan mujhe

khusrav se tesha bola jo chatun na tera khuun

shirin na hove khun-e-sar-e-koh-kan mujhe

rukh par tumhare daam jo Daala hai sabze ne

aata nazar hai dida-e-anqa-dahan mujhe

ye dil vo hai ki kar de zamin asman ko khaak

ik dam ko barq de jo pinha pairahan mujhe

kuche men tere kaun tha leta bhala khabar

shab chandni ne aa ke pahnaya kafan mujhe

dikhlata asman se hai ru-e-zamin ki sair

ai rashk-e-mah teri jabin ka shikan mujhe

rakhta hai chashm-e-lutf pe kis kis ada ke saath

deta hai jaam saqi-e-paiman-shikan mujhe

hai jazb-e-dil durust to chah-e-firaq se

khinchegi teri zulf shikan-dar-shikan mujhe

dikhlata ik ada men hai sau sau tarah banao

is sada-pan ke saath tira bankpan mujhe

jaise kuen men ho koi taara chamak raha

dil sujhta hai yuun tah-e-chah-e-zaqan mujhe

aa kar use bhi do kabhi ankhen zara dikha

ankhen dikha raha hai ghazal-e-khutan mujhe

aa ai mire chaman ki hua men tiri hava

sahra-e-dil hua hai chaman-dar-chaman mujhe

ya rab ye dil hai ya ki hai aina-e-nazar

dikhla raha hai sair o safar dar vatan mujhe

aaya huun nuur le ke main bazm-e-sukhan men ‘zauq’

ankhon pe sab bithaenge ahl-e-sukhan mujhe

Leave a Comment