akbar-hyderabadi

Jin Ke Nasib Mein Aab-O-dana Kam Kam Hota Hai

jin ke nasib men ab-o-dana kam kam hota hai

maail un ki samt zamana kam kam hota hai

raste hi men ho jaati hain baten bas do-char

ab to un ke ghar bhi jaana kam kam hota hai

mushkil hi se kar leti hai duniya use qubul

aisi haqiqat jis men fasana kam kam hota hai

kabhi jo baten ishq ke sal-o-sin ka hasil thiin

ab un baton ka yaad aana kam kam hota hai

rind sabhi saghar par saghar chhalkate jaate hain

kyuun labrez mira paimana kam kam hota hai

baat pate ki kar jaata hai yuun to kabhi kabhi

hosh men lekin ye divana kam kam hota hai

kitni muqaddas hogi ‘akbar’ us bachche ki pyaas

jis ki ik Thokar se ravana zamzam hota hai

More Poems

Leave a Comment