Ahmad Rahi
dil ke sunsan jaziron ki khabar laega
dard pahlu se juda ho ke kahan jaega
kaun hota hai kisi ka shab-e-tanhai men
gham-e-furqat hi gham-e-ishq ko bahalaega
chand ke pahlu men dam saadh ke roti hai kiran
aaj taron ka fusun khaak nazar aaega
raag men aag dabi hai gham-e-mahrumi ki
raakh hokar bhi ye shola hamen sulgaega
vaqt khamosh hai ruthe hue yaron ki tarah
kaun lau dete hue zakhmon ko sahlaega
zindagi chal ki zara maut ke dam-kham dekhen
varna ye jazba lahad tak hamen le jaega
Leave a Reply