un ki mahfil men hamesha se yahi dekha rivaj
aankh se bimar karte hain tabassum se ilaaj
main jo roya un ki ankhon men bhi aansu aa ga.e
husn ki fitrat men shamil hai mohabbat ka mizaj
meri ḳhatir ḳhud uThate hain vo taklif-e-karam
kaun rakhta varna mujh jaise gunahgaron ki laaj
mere hone aur na hone par hi kya mauquf hai
maut par un ki hukumat zindagi par un ka raaj
uf vo aariz jis ke jalvon par fida mehr-e-mubin
aah vo lab jin ko dete hain mah o anjum ḳhiraj
main huun ‘anvar’ un ki zat-e-pak ka adna ghulam
hai sar-e-aqdas pe jin ke rahmat-e-yazdan ka taaj
Leave a Reply