teri duniya se ye dil is liye ghabrata hai
is sarae men koi aata koi jaata hai
tu ne kya dil ki jagah rakkha hai patthar mujh men
gham se bhar jaun bhi to rona nahin aata hai
vo mire ishq ki gahrai samajhta hi nahin
rasta duur talak jaae to bal khata hai
phir bhala kis ke liye itni chamakti hai ye ret
koi dariya bhi nahin hai jo kahin jaata hai
us ke hathon men vo parkar hai jis se ‘gauhar’
ghuum jaati hai zamin asman chakrata hai
Leave a Reply