Hasin-Tar

kal ek tu hogi aur ik main

koi raqib-e-rafiq-surat

koi rafiq-e-raqib-saman

mire tire darmiyan na hoga

hamari umr-e-ravan ki shabnam

tiri siyah kakulon ki raton

men taar chandi ke gundh degi

tire hasin arizon ke rangin

gulab bele ke phuul honge

shafaq ka har rang gharq hoga

latif o pur-kaif chandni men

tiri kitab-e-ruḳh-e-javan par

ki jo ghazal ki kitab hai ab

zamana likkhega ik kahani

aur an-ginat jhurriyon ke andar

miri mohabbat ke saare bose

hazar lab ban ke hans padenge

ham apni biiti hui shabon ki

saloni parchhaiyon ko le kar

ham apne ahd-e-tarab ki shaam o

sahar ki ranaiyon ko le kar

purani yadon ke jism-e-uryan

ke vaste pairahan bunenge

phir ek tu hogi aur ik main

koi raqib-e-rafiq-surat

ko rafiq-e-raqib-saman

mire tire darmiyan na hoga

havas ki nazron ko tere ruḳh par

jamal-e-nau ka guman na hoga

faqat miri husn-e-azmuda

nazar ye tujh ko bata sakegi

ki teri piiri ka husn tere

shabab se bhi hasin-tar hai

Leave a Comment