Rashid Shahjahanpuri
rah-e-ishq men zindagani luTa di
mili javedani to faani luTa di
vo thi ḳhvah baaqi ki faani luTa di
tire naam par zindagani luTa di
mohabbat ki ik na-muradi ki ḳhatir
zamane ki har shadmani luTa di
dil-e-zar ne tere jalvon ke aage
tavana.i-o-na-tavani luTa di
ḳhudi jis men basti vo basti to dil ne
ba-taqrib-e-yak lan-tarani luTa di
bata.i bahut qadr izzat ki ham ne
magar ek dil ne na maani luTa di
mira jurm kya hai ki barham hain naseh
luTane ki shai thi javani luTa di
gaya ziist ke saath dagh-e-alam bhi
ḳhajil huun ki un ki nishani luTa di
magar hal-e-dil sher men un se kah luun
tabi.at ki saari ravani luTa di
ba-farma.ish-e-yar-e-dam-saz main ne
‘rashid’ aaj jadu-bayani luTa di
Leave a Reply