arsh tak jo be-ḳhata jaata hai ye vo tiir hai
ghair samjha hai ki meri aah be-tasir hai
ḳhugar-e-qaid-e-vafa par khul chuka zindan ka raaz
jurm thi vo qaid ye us jurm ki tazir hai
be-gunahi se bhi baḌh kar hai agar koi gunah
to saza-e-ishq pa kar ḳhajlat-e-taqsir hai
chhoḌ meri fikr ghafil ro ḳhud apni qaid par
jis ko tu zevar samajhta hai vahi zanjir hai
sijn o jannat donon ai kafir hain is duniya ke naam
vo azal se baḳht-e-momin ye tiri taqdir hai
daar hi banti hai ai dil zina-e-meraj-e-ishq
ḳhvab-e-aghaz-e-mohabbat ki yahi tabir hai
ho na uljhan jab junun-e-jama-var kamil na ho
jab talak daman hai ḳhar-e-dasht daman-gir hai
haath to honge qalam par nama-bar ye bhi kaha
dil chura leti hai pahlu se ye vo tahrir hai
pa.edari men hai qasron se siva kachchi si qabr
jo qayamat tak rahe qaa.im ye vo tamir hai
ḳhun-e-nahaq ka kisi ke shubah aur tum par magar
sina-e-‘jauhar’ men dekho to ye kis ka tiir hai
Leave a Reply