Nashtar Khaanqahi
ilm kis ko tha ki tarsil-e-hava ruk ja.egi
agle mausam tak miri nashv-o-numa ruk ja.egi
ho chukega daf.atan zauq-e-sama.at muḳhtalif
aate aate mere honTon tak sada ruk ja.egi
tu hi kyuun nadim hai itni mere ghar ki aabru
kis ke sar par aisi andhi men rida ruk ja.egi
ab tamasha dekhne valon men ham-saya bhi hai
TuTti chhat mere chillane se kya ruk ja.egi
karvan ko gher hi lega sukut-e-regzar
gunjne se qabl hi bang-e-dara ruk ja.egi
kal na hoga koi is basti men mera muntazir
kal mire talvon hi men avaz-e-pa ruk ja.egi
kya tahaffuz de sakegi mujh ko vaz-e-ehtiyat
kya dariche muund lene se bala ruk ja.egi
Leave a Reply