mujhe rang-e-khvab se zindagi ka yaqin mila
kabhi dil dukha to kuchh aur bhi vo qarin mila
koi qissa hijr-o-visal ka na suna mujhe
jo harim-e-dard tak aa gaya so vahin mila
sar-e-khvab hi kabhi tum bhi to mujhe dekhte
vo tilism tha ki falak bhi zer-e-nagin mila
isi aaine se milengi meri gavahiyan
tumhen aks mera jis aaine men nahin mila
kahin naqsh-e-pa koi mauj-e-rang nahin thi main
main vo soch huun jise e’tibar-e-jabin mila
miri zindagi kadi dhuup men to kati magar
miri chhanv sa koi saeban bhi kahin mila
hua yuun ki phir mujhe zindagi ne basar kiya
koi din the jab mujhe har nazara hasin mila
Leave a Reply