Azm Bahzad
jo yahan hazir hai vo misl-e-guman maujud hai
aur jo gha.eb hai us ki dastan maujud hai
ai ghubar-e-ḳhvahish-e-yak-umr apni raah le
is gali men tujh se pahle ik jahan maujud hai
ab kisi amboh-e-gum-gashta ki janib ho safar
aur koi chupke se kah de tu kahan maujud hai
shayad aa pahuncha hai ahd-e-intizar-e-guftugu
chaar janib ḳhilqat-e-lab-bastagan maujud hai
raat phir ankhon se bah nikli tamanna-e-visal
aisa lagta tha ki tu bhi darmiyan maujud hai
pahle thi ik tishnagi mahrumiyon se ham-kanar
ab ragon men nashsha-e-umr-e-ravan maujud hai
azm ḳhud ko karvan-e-nafa men shamil na kar
tere shanon par abhi bar-e-ziyan maujud hai
Leave a Reply