Poet
na-muradi hi likhi thi so vo puuri ho ga.i
zindagi jal kar bujhi aur raakh jaisi ho ga.i
log kya samjhen ki gham se shakl kaisi ho ga.i
aa.ina TuuTa to qimat aur duuni ho ga.i
rafta rafta duriyon se aanch dhimi ho ga.i
lekin ik tasvir thi dil men jo gahri ho ga.i
do nigahon ka tasadum chand lamhon ka saval
aur rusva.i jahan men umr-bhar ki ho ga.i
yaad se teri hue pur-nur apne roz-o-shab
dil ki ra.ana.i baḌhi aur raat ujli ho ga.i
soz-e-dil ne rafta rafta raakh ham ko kar diya
ham ye samjhe the ki shayad aag ThanDi ho ga.i
kitne jauhar kar diye paida ma.al-e-ishq ne
dil men kaisa soz kaisi dard-mandi ho ga.i
‘vajd’ ham ab tak na samjhe ramz-e-takmil-e-vafa
dam ghuTa raton ko aksar jaan aadhi ho ga.i
Leave a Reply