tavil raton ki khamushi men miri fughan thak ke so gai hai
tumhari ankhon ne jo kahi thi vo dastan thak ke so gai hai
gila nahin tujh se zindagi ke vo zaviye hi badal chuke hain
miri vafa vo tire taghaful ki nauha-khvan thak ke so gai hai
mire khayalon men aaj bhi khvab ahd-e-rafta ke jagte hain
tumhare pahlu men kahish-e-yad-e-astan thak ke so gai hai
sahar ki ummid ab kise hai sahar ki ummid ho bhi kaise
ki ziist ummid o na-ummidi ke darmiyan thak ke so gai hai
na jaane main kis udhed-bun men ulajh gaya huun ki mujh ko ‘rahi’
khabar nahin kuchh vo arzu-e-sukun kahan thak ke so gai hai
Leave a Reply