Mail-Zabt Bhi Aamada-E-Fariyaad Bhi Hai

Arsh Malsiyani

ma.il-zabt bhi amada-e-fariyad bhi hai

dil giraftar-e-mohabbat bhi hai azad bhi hai

dastan-e-dil-e-masum na puchh ai hamdam

ye vo basti hai jo abad bhi barbad bhi hai

ai mire zabt ko kamil na samajhne vaale

qabil-e-dad miri koshish-e-fariyad bhi hai

uḌ ke ja.un bhi to kya aur na ja.un bhi to kya

muntazir barq bhi hai taak men sayyad bhi hai

kya likhun kya na likhun surḳhi-e-afsana-e-dil

gham bhi hai dard bhi hasrat bhi hai fariyad bhi hai

dil-e-divana ki to hasti-e-hushiyar na puchh

ye giraftar-e-qafas ta.ir-e-azad bhi hai

meri taskin to kar bhuul ke itna to bata

yaad rakhne ka jo va.ada tha tujhe yaad bhi hai

ik ‘ravish’ dil ki ho ai ‘arsh’ to kuchh baat bhi ho

kya musibat hai ki ye shaad bhi nashad bhi hai