Mushtaq Naqvi
muddaton ye soch kar tanha.i men taḌpa kiye
ho ga.e ham se juda vo aur ham dekha kiye
ek lamhe men jo kar baiThe hain divane tire
log sadiyon us ki la-mahdudiyat samjha kiye
kamyabi apne hisse men kabhi thi hi nahin
ham ne nakami se apne raste paida kiye
bevafa.i us ki mere saath mat shamil karo
jurm ham ne ishq men jitne kiye tanha kiye
haath lagte hi bikhar jaata hai jin ka shoḳh rang
umr bhar in titliyon ki khoj men bhaga kiye
Leave a Reply