duniya ki dil dukhane ki aadat nahin ga.i
apni bhi muskurane ki aadat nahin ga.i
daman jala ye dil jala ye ungliyan jalin
apni diye jalane ki aadat nahin ga.i
kuchh vo ghanim-e-jan bhi hai mustaqil-mizaj
kuchh meri jaan se jaane ki aadat nahin ga.i
us se kaho ḳhulus se luuTa kare mujhe
meri fareb khane ki aadat nahin ga.i
vo shahr bad-nasib hai us ke mizaj men
mohsin ka ghar jalane ki aadat nahin ga.i
kuchh raushni se un ko adavat azal se hai
kuchh apni jagmagane ki aadat nahin ga.i
phunkon se aftab bujhane ki justuju
bachchon si is zamane ki aadat nahin ga.i
go talḳhi-e-hayat se pathra gaya vo shaḳhs
lekin ghazal sunane ki aadat nahin ga.i
Leave a Reply