ajiz-matvi

Yun Tujhse dur dur Rahun Ye Saza Na de

yuun tujh se duur duur rahun ye saza na de

ab aur zinda rahne ki mujh ko dua na de

ab ehtiyat-e-shiddat-e-girya na puchhiye

darta huun main vo sun ke kahin muskura na de

lo main ne dil ki us se lagai to hai magar

dar hai ye sham-e-gham kahin daman jala na de

kahna to hai mujhe bhi hadis-e-gham-e-hayat

lab kholne ki kaash ijazat zamana de

ho bijliyon ka mujh se jahan par muqabla

ya-rab vahin chaman men mujhe ashiyana de

us dene vaale ke yahan kis shai ki hai kami

tum mangne ki tarah jo mango to kya na de

hassas main bahut huun na lag jaae dil ko Thes

mahfil men muskura ke mujhe yuun sada na de

main ashna-e-dard-o-gham-e-dil huun chara-gar

jis se ifaqa ho mujhe aisi dava na de

‘ajiz’ tamam umr main khata raha fareb

mujh ko miri vafaon ka aisa sila na de

More Poems

Leave a Comment