kyuun vasl men bhi aankh mila.i nahin jaati
vo farq dilon ka vo juda.i nahin jaati
kya dhuum bhi nalon se macha.i nahin jaati
soti hui taqdir jaga.i nahin jaati
kuchh shikva na karte na bigaḌta vo shab-e-vasl
ab ham se koi baat bana.i nahin jaati
dekho to zara ḳhaak men ham milte hain kyunkar
ye nichi nigah ab bhi uTha.i nahin jaati
kahti hai shab-e-hijr bahut zinda rahoge
manga karo tum maut abhi aa.i nahin jaati
vo ham se mukaddar hain to ham un se mukaddar
kah dete hain saaf apni safa.i nahin jaati
ham sulh bhi kar len to chali jaati hai un men
baham dil o dilbar ki laḌa.i nahin jaati
ḳhud dil men chale aaoge jab qasd karoge
ye raah batane se bata.i nahin jaati
chhupti hai ‘jalal’ ankhon men kab hasrat-e-didar
sau parde agar hon to chhupa.i nahin jaati
Leave a Reply