chiiz dil hai ruḳh-e-gulfam men kya rakkha hai
kaif sahba men hai ḳhud jaam men kya rakkha hai
gungunata hua dil chahiye jiine ke liye
is naza-e-sahar-o-sham men kya rakkha hai
kaun kis tarah se hota hai harif-e-mai-e-zist
aur talḳhaba-e-ayyam men kya rakkha hai
ishq karta hai to kar aur nigahon ko buland
rishta-e-rah-guzar-o-bam men kya rakkha hai
murgh-e-azad hua kya tiri ḳhuddari ko
chand danon ke siva daam men kya rakkha hai
husn fankar ki ik chheḌ hai ishq-e-nadan
bevafa.i ke is ilzam men kya rakkha hai
dekhna ye hai ki vo dil men makin hai ki nahin
chahe jis naam se ho naam men kya rakkha hai
den mire zauq-e-parastish ko dua.en ‘mulla’
varna patthar ke in asnam men kya rakkha hai
Leave a Reply