Saleem Shahid
bujh ga.e sho.ale dhuan ankhon ko paani de gaya
ye achanak moḌ dariya ko ravani de gaya
ab to us ki dhuup men jalta hai mera tan-badan
kya hua vo mehr jo sub.hen suhani de gaya
ji men zinda ho ga.iin kya ḳhvahishen bisri hui
phir koi yusuf zuleḳha ko javani de gaya
phir hua ehsas yuun mujh ko ki main ik naqsh huun
kaun tasviron ko hukm-e-be-zabani de gaya
peḌ nange ho ga.e raston pe patte hain abhi
haan magar tufan kuchh yaden nishani de gaya
main subuk-sar tha havaon ki tarah par ab nahin
yak-ba-yak rukna tabi.at ko girani de gaya
bolta chehra jhuki ankhen chhupa mat haath se
tera chup rahna mujhe kya kya ma.ani de gaya
jaise mere pair mauj-e-vapsin par jam ga.e
har naya lamha koi surat purani de gaya
ai lab-e-goya na chhin jaa.e kahin ye za.iqa
chaTiye vo zaḳhm jo sho.ala-bayani de gaya
main ne ‘shahid’ aa.ine men apni surat dekh li
ye zara sa vaqi.a puuri kahani de gaya
Leave a Reply